ДЭКЛАРАЦЫЯ
АБ ПРЫНЦЫПАХ ДОБРАСУСЕДСКIХ АДНОСIН
ПАМIЖ РЭСПУБЛIКАЙ БЕЛАРУСЬ I ЛIТОЎСКАЙ РЭСПУБЛIКАЙ *)
_____________________________
*) Уступiла ў сiлу 24 кастрычнiка 1991 г.
Рэспублiка Беларусь i Лiтоўская Рэспублiка
- грунтуючыся на Дэкларацыi Вярхоўнага Савета Беларускай ССР аб
дзяржаўным суверэнiтэце Беларускай ССР ад 27 лiпеня 1990 года i
Законе аб наданнi Дэкларацыi аб дзяржаўным суверэнiтэце Беларускай
ССР статуса канстытуцыйнага закона ад 25 жнiўня 1991 года, а таксама
на Акце Вярхоунага Савета Лiтоўскай Рэспублiкi аб аднаўленнi
незалежнасцi Лiтоўскай дзяржавы ад 11 сакавiка 1990 года i
Канстытуцыйным Акце аб Лiтоўскай дзяржаве ад 11 лютага 1991 года;
- улiчваючы шматвяковыя традыцыi палiтычных, гiстарычных,
эканамiчных i культурных сувязей памiж Беларуссю i Лiтвой;
- кiруючыся прынцыпамi Статута Арганiзацыi Аб'яднаных Нацый i
палажэннямi Заключнага акта Нарады па бяспецы i супрацоўнiцтву ў
Еўропе, Парыжскай хартыi для Новай Еўропы i iншых дакументаў гэтай
Нарады;
- усведамляючы сваю адказнасць за мiжнародны мiр, бяспеку,
узаемаразуменне, супрацоўнiцтва i ўлiчваючы значэнне
беларуска-лiтоўскiх адносiн для свабоднай, дэмакратычнай i
паважаючай правы чалавека Еўропы;
- выказваючы ўзаемную зацiкаўленасць у развiццi добрасуседскiх
адносiн i ўсебаковага супрацоўнiцтва памiж дзвюмя дзяржавамi;
заяўляюць наступнае:
1. Рэспублiка Беларусь i Лiтоўская Рэспублiка грунтуюць свае
адносiны на ўзаемнай павазе дзяржаўнага суверэнiтэту адзiн аднаго.
2. Рэспублiка Беларусь i Лiтоўская Рэспублiка ў сваiх адносiнах
кiруюцца прынцыпамi раўнапраўя, тэрытарыяльнай цэласнасцi дзяржаў,
неўмяшання ва ўнутраныя справы, павагi правоў чалавека,
добрасуседства, узаемаразумення i ўзаемавыгаднага супрацоўнiцтва.
3. Рэспублiка Беларусь i Лiтоўская Рэспублiка лiчаць прынцып
непарушнасцi гранiц, зафiксаваны ў Хельсiнкскiм Заключным Акце,
важнейшым фактарам стабiльнасцi ў Еўропе. Канкрэтныя пытаннi
дэлiмiтацыi беларуска-лiтоўскай гранiцы i наступнай яе дэмаркацыi
падлягаюць дакладнаму разгляду ў блiжэйшы час, i з гэтай мэтай
Рэспублiка Беларусь i Лiтоўская Рэспублiка створаць змешаную камiсiю
з прадстаўнiкоў абедзвюх дзяржаў.
4. Рэспублiка Беларусь i Лiтоўская Рэспублiка прызнаюць асобую
важнасць пытанняў бяспекi i будуць iмкнуцца да добрага
супрацоўнiцтва ў гэтай галiне, да ўзгаднення дзеянняў як на
двухбаковым, так i на мiжнародным узроўнi. Рэспублiка Беларусь i
Лiтоўская Рэспублiка лiчаць недапушчальным магчымае ўтварэнне,
знаходжанне i дзеяннi любых узброеных фармiраванняў на тэрыторыi
аднаго з бакоў, падпiсаўшых Дэкларацыю, накiраваныя супраць другога
боку.
5. Рэспублiка Беларусь i Лiтоўская Рэспублiка будуць iмкнуцца
забяспечыць адпаведна лiтоўцам у Беларусi i беларусам у Лiтве правы
i свабоды, роўныя правам i свабодам сваiх грамадзян.
Рэспублiка Беларусь i Лiтоўская Рэспублiка прызнаюць этнiчную,
культурную i моўную самабытнасць беларусаў у Лiтве i лiтоўцаў у
Беларусi i абавязваюцца забяспечваць iм умовы для свабоднага
развiцця гэтай самабытнасцi i садзейнiчаць iх сувязям са сваёй
нацыяй у другой падпiсаўшай Дэкларацыю дзяржаве. У гэтых мэтах бакi
будуць iмкнуцца да стварэння для беларусаў у Лiтве i лiтоўцаў у
Беларусi адпаведных магчымасцей у галiне адукацыi, навукi, культуры
i рэлiгii.
Рэспублiка Беларусь i Лiтоўская Рэспублiка забяспечаць ахову на
сваёй тэрыторыi гiстарычных i культурных помнiкаў абодвух народау.
6. Рэспублiка Беларусь i Лiтоўская Рэспублiка будуць развiваць
усебаковае культурнае i навуковае супрацоўнiцтва, садзейнiчаць
пашырэнню кантактаў памiж культурнымi i навуковымi ўстановамi,
арганiзацыямi, спецыялiстамi i асобнымi грамадзянамi.
Праяўляючы асаблiвы клопат аб выхаваннi падрастаючага пакалення
ў духу мiру, узаемнай павагi i ўзаемаразумення памiж народамi,
Рэспублiка Беларусь i Лiтоўская Рэспублiка будуць iмкнуцца да
аб'ектыўнага асвятлення гiсторыi ў працэсе навучання ў сiстэме
дзяржаўнай i прыватнай адукацыi.
7. Рэспублiка Беларусь i Лiтоўская Рэспублiка будуць
садзейнiчаць узаемавыгаднаму развiццю гандлёвага абмену,
эканамiчнаму i навукова-тэхнiчнаму супрацоўнiцтву i ў гэтых мэтах у
блiжэйшы час падпiшуць гандлёва-эканамiчнае пагадненне.
8. Рэспублiка Беларусь i Лiтоўская Рэспублiка будуць актыўна
супрацоўнiчаць у галiне аховы навакольнага асяроддзя i рацыянальнага
выкарыстання прыродных рэсурсаў, асаблiвую ўвагу ўдзяляючы басейну
рэк Нёман-Нерыс, групе Браслаўскiх азёр i бяспецы эксплуатацыi
атамных электрастанцый, у мэтах папярэджвання трансгранiчных
забруджванняў i лiквiдацыi iх вынiкаў.
9. Усе пытаннi, якiя ўзнiкаюць у адносiнах памiж Рэспублiкай
Беларусь i Лiтоўскай Рэспублiкай, будуць рэгулявацца iмi ў ходзе
двухбаковых кансультацый i перагавораў.
10. Рэспублiка Беларусь i Лiтоуская Рэспублiка будуць
супрацоўнiчаць на мiжнароднай арэне i праводзiць кансультацыi па
тых пытаннях мiжнародных адносiн, якiя ўяўляюць для iх цiкавасць.
11. Прынцыпы гэтай Дэкларацыi будуць развiты i замацаваны ў
мiждзяржаўным дагаворы памiж Рэспублiкай Беларусь i Лiтоўскай
Рэспублiкай.
Старшыня Вярхоўнага Савета Старшыня Вярхоўнага Савета
Рэспублiкi Беларусь Лiтоўскай Рэспублiкi
С.ШУШКЕВIЧ В.ЛАНДСБЕРГIС
|
