"Пагадненне аб супрацоўнiцтве памiж Галоўным архiўным упраўленнем пры Савеце Мiнiстраў Рэспублiкi Беларусь i Генеральнай дырэкцыяй дзяржаўных архiваў Латвiйскай Рэспублiкi"

Зарегистрировано в НРПА РБ 30 апреля 2010 г. N 3/2507

--------------------------------

<*> Набыло моц 23 красавiка 1992 года.

Кiруючыся ўзаемным iмкненнем да ўсебаковага развiцця супрацоўнiцтва памiж архiўнымi ўстановамi дзвюх рэспублiк, Галоўнае архiўнае ўпраўленне пры Савеце Мiнiстраў Рэспублiкi Беларусь i Генеральная дырэкцыя дзяржаўных архiваў Латвiйскай Рэспублiкi, якiя ў наступным называюцца "бакi", дамовiлiся аб нiжэйпададзеным:

Артыкул 1

Бакi разгортваюць супрацоўнiцтва на падставе ўзаемнасцi i з выкананнем адпаведных заканадаўстваў абедзвюх рэспублiк, а таксама мiжнародных пагадненняў.

Артыкул 2

Бакi развiваюць абмен вопытам памiж архiўнымi ўстановамi па напрамках дзейнасцi, якiя iх цiкавяць. У гэтых мэтах бакi абменьваюцца iнфармацыяй па ўзнiкаючых у iх праблемах архiўнай справы i ажыццяўляюць абмен спецыялiстамi-архiвiстамi на ўзаемнай аснове.

Канкрэтныя мэты i ўмовы гэтых абменаў вызначаюцца па дамоўленасцi памiж адпаведнымi архiўнымi ўстановамi бакоў.

Артыкул 3

Кожны з дагаворных бакоў перадае другому боку пералiкi нарматыўна-метадычных распрацовак, навукова-iнфармацыйных выданняў i дакументальных публiкацый, якiя выйшлi ў свет на працягу каляндарнага года.

Бакi абменьваюцца па запыту другога боку заканадаўчымi i iншымi нарматыўнымi дакументамi па арганiзацыi архiўнай справы ў рэспублiцы, навукова-тэхнiчнымi распрацоўкамi (правiлы працы, метадычныя рэкамендацыi, вынiкi навукова-даследчых работ, матэрыялы навуковых канферэнцый, семiнараў i да т.п.), навукова-iнфармацыйнымi даведнiкамi, зборнiкамi дакументаў.

Артыкул 4

У мэтах папаўнення нацыянальных архiўных фондаў дакументамi, якiя змяшчаюць iнфармацыю па гiсторыi Беларусi i Латвii, бакi прад'яўляюць адзiн аднаму копii архiўных дакументаў. Абмен копiямi адбываецца на парытэтных асновах або па прымальных для бакоў дагаворных цэнах.

Бакi ўзаемадзейнiчаюць у выяўленнi няпрофiльных дакументаў па гiсторыi Беларусi i Латвii, якiя знаходзяцца ў архiвах iншага боку. Пытаннi вяртання такiх дакументаў вызначаюцца на падставе заканадаўстваў бакоў у адпаведнасцi са спецыяльнымi пагадненнямi.

Артыкул 5

Бакi будуць ажыццяўляць сумесныя публiкацыi архiўных дакументаў i рыхтаваць дакументальныя выставы па ўзгодненай тэматыцы.

Артыкул 6

Кожны з дагаворных бакоў аказвае садзейнiчанне даследчыкам другога боку ў працы ў яго дзяржаўных архiвах.

З гэтай мэтай даследчыкi маюць права карыстацца ўсiм навукова-даведачным апаратам да дакументаў па выбранай тэме даследвання.

Артыкул 7

Бакi будуць разгортваць супрацоўнiцтва па пытаннях, якiя закранаюць iх удзел у мiжнародных архiўных арганiзацыях.

Артыкул 8

Супрацоўнiцтва ў рамках дадзенага пагаднення не перашкаджае iншым формам магчымых кантактаў у галiне архiўнай справы, якiя ажыццяўляюцца па ўзаемнай згодзе бакоў.

Артыкул 9

У дадзенае пагадненне могуць быць унесены змены па ўзаемнай згодзе бакоў.

Артыкул 10

Дадзенае пагадненне ўваходзiць у сiлу з дня падпiсання i дзейнiчае на працягу 5 гадоў.

Пагадненне складзена ў г. Мiнску i Рызе ў двух экземплярах, кожны на беларускай i латышскай мовах, якiя маюць аднолькавую сiлу, i падпiсана 23 красавiка 1992 года.

За Галоўнае архiўнае ўпраўленне           За Генеральную дырэкцыю
пры Савеце Мiнiстраў                      дзяржаўных архiваў
Рэспублiкi Беларусь                       Латвiйскай Рэспублiкi
            Начальнiк упраўлення                      Генеральны дырэктар
            А.М.Мiхальчанка                           В.Э.Шталс